Saluti, fiòoi...., l'è quasi mesanott!

( stavolta ciapi seu da mé muéer)

che ghji prumìss che séri a cà alle ott

e che g'arèss beìit gnanca 'n biciéer!

E invece.... al chi.....al chi! Sto gnàan in pée!

Me gira anca la téesta per fà bèll....

.....'ndùa vèet, adèss... vèet  zò dal marciapée?

Va dritt, va dritt, se no gira 'l supéll!

No: chésta chi la me pàar mia la mìa

de strada, e gnanca la me pòorta.....

Ma sè.... andum avanti n'altra via....

cum'èela..... ma anca chesta chi l'è storta ?

Sa catet seu, i còodoi, anca adèss?

( ma no che la me pàar anca asfaltàada)....

Va a casa cul nàas rott.... ghe mancarèss!

.....Eeh! Sbàteme zò àan l'angol de la stràada!

Me fo cusé: dato ch'el mòond el gìira,

me séti chi 'ndua gh'è en pòo de luus:

quàand pàsa la mé pòorta, basta che tira

fòora la ciàav.... e dèenter in del buus!